Gero eta beharrezkoagoa ikusten dut albiste pozgarrien zerbitzu bat. Egunean hiru berri on bidaliko lizkioke harpidedunari. Ondo aukeratuak. Ederrak. Hunkigarriak. Optimistak. Harpidedunak jaso eta autobusean aldamenean esertzen zaion lagun betizuarekin komentatuko lituzke. "Nondik atera dituzu?" galdetuko luke honek. "Zerbitzu bat da, egunero jasotzen ditut", erantzun harpidedunak. Eta betizuak betizu aurpegiarekin begiratzen jarraituko luke ziurrenik. Eta etxera joan eta begiratu egia ote den horrelakorik existitzen dela. Bai. Existituko litzateke. Bizi ditugun egun beltz hauetan negozio borobila dela uste dut. Kontrabandoa, merkatu beltza edo droga salmenta bezala.